5 / 100
5
2022 UNDERGRADUATE PROSPECTUS
MOLAETŠA GO TŠWA GO
MOTLATŠAMOKHANSELIRI
LE HLOGO
E se kgale o tla be o thoma leeto le le mpsha.
Dikgetho tšeo o di dirago ga bjale, menyako yeo
o kgethago go e bula ga bjale, di tla ba le khuetšo
ye e tseneletšego mo bophelong bja gago. Tše
pedi tša diphetho tše bohlokwa kudu tše o tla go
di dira ke gore o tlo ithuta eng le gore o tlo ithuta
kae. Ke yunibesithi efe yeo o tlo go e kgetha gore
e be legae la gago?
Afrika Borwa e mo diphetogong tše di kgolo kudu.
Naga ya rena e nyaka baetapele ba ba kaone kudu
go re hlahla go ya go bokamoso bjo bo atlegilego,
bokamoso bjo bo tšwetšago pele o mongwe le o
mongwe. Go etapele tsebo gabotse go bohlokwa e
bile ka gona thuto e bohlokwa. Ge o sa tsebe o ka se
etepele. Ka mo Yunibesithing ya Johannesburg (UJ),
re ikgafile go go hlolela maemo a gore o tle o be o
mongwe wa baetapele ba tlhohleletšo le mafolofolo.
Maikemišetšo a rena a magolo ke tšwelopele ya
gago ka mo dithutong le tlhabollo ya bohlale le
gore la bofelo re betle sealoga seo se tlabaketšwego
ka botlalo go tsena lefaseng la mošomo, mo gae le
dinageng tša ka ntle. Pono ya rena ke go le ruta gore
le be batšeakarolo ba mafolofolo ka go phetogo e
kgolo ya bone ya intasteri moo theknolotši e fetolago
mahlakore ka moka a maphelo a rena go akaretša
magae a rena le mafelo a mošomo.
Ka mo UJ, o tla kopana le menagano e me kaonekaone
ya thuto go tšwa dinageng tšeo di phatlaletšego
mo lefaseng, yeo e tla go go thuša katlegong ya
gago ya dithuto. Gape o tla hwetša monyetla wa
go kgetha go tšwa go kgetho ye e phatlaletšego
ya mananeo a maemo a godimo kudu, go tšwa go
diploma tša ka fase go ya go ditikrii tša bongaka ka
mo go difakhalithi tša rena tše seswai. Mekgwa yeo
e tletšego ka theknolotši, yeo e bapetšwago gabotse
le ya diyunibesithi tše di kaonekaone mo lefaseng, e
šomišwa go ruta le go ithuta.
Baithuti ba rena ke meloko ya rena. Re fana ka
tikologo ya lethabo, polokego, thekgo le ya go
tsošološa bohlale. O tla kgona go godiša kgokagano
ya bagwera yeo e tla go kgotlelela bophelong bja
gago ka moka.
Re tliša šedi yeo e sa fetogego go oketša boitemogelo
bja gago bja go ba moithuti. Go go thuša go fetoga
go tšwa sekolong go tla yunibesithi, Lenaneo la
Boitemogelo bja Ngwaga wa Mathomo la UJ le fana
ka thekgo le menyetla ya tlhabollo, mola mananeo a
thuto a maatla le thekgo ya bathušabafahloši a dira
bonnete bja gore go ba le leeto leo le kopanego ka
nako ya dithuto tša gago tša yunibesithi. Lenaneo la
rena la Boitemogelo bja Mengwaga ya ka Godimo
le tla go kaonafatša go ya go ngwaga wa gago
wa mafelelo, go aloga le ka morago ga moo, e ka
ba go tikrii ya ka godimo goba go ya go bophelo
bja profešenale. Mekgwa e mengwe ya thekgo le
menyetla ya tlaleletšo e tla thuša go tlhabollo ya
gago ka botlalo.
Ka mo UJ, gape re na le kgahlego ka ga tirelo ya
setšhaba le go tliša diphetogo ka mo setšhabeng sa
rena. O tla hwetša monyetla wa go ikopanya le baithuti
ba bangwe gore o tliše diphetogo tše di botse.
Maemo a lefase a UJ le thuto ye e tiilego di tsebja ke
ba mehuta ya kelo ya maemo a godimo kudu ka go
thuto ya godimo mo lefaseng. Ka tlaleletšo, UJ ke
yunibesithi ya Afrika e nnoši ya go fiwa tlhompho
ya boleloko go U21, mokgatlo wa maemo a godimo
wa diyunibesithi tša lefase go tšwa go kontinente e
nngwe le e nngwe, bontši bja tšona di bewa go tše
100 tša ka godimo mo lefaseng. Boleloko bjo bo re
kgokaganya le tše di kaonekaone ka go thuto ya ka
godimo mo lefaseng.
UJ ke yunibesithi e mpsha, ya matšato e bile dialoga
tša rena di tlogela maswao a bona ka mo nageng ya
rena, kontinenteng le go feta. Re hlohleletša baithuti
ba rena gore e be bakgathatema ba mafolofolo
ka go Phetogo e Kgolo ya Bone ya Intasteri, moo
theknolotši e fetolago mahlakore ka moka a maphelo
a rena, go akaretša magae a rena le mafelo a
mošomo. Lengwalo la gago la thuto la UJ le hlamilwe
go go thuša go thakgola tša mošomo wa gago gore
ge o aloga, o be le dilo ka moka tšeo o di nyakago
gore o be motho yo a naganago ka bofsa bokamoso
gore o hole lefase la rena – moemedi wa nnete wa
leswao la UJ.
Kgetho ya gago ya UJ bjalo ka legae la gago la tša
thuto ke peeletšo e kaonekaone yeo o ka e dirago.
Prof Tshilidzi Marwala
Motlatšamokhanseliri le Hlogo